Aprelin 2-də Azərbaycan Respublikasının Prezidenti İlham Əliyev və Almaniya Federativ Respublikasının Prezidenti Frank-Valter Ştaynmayer mətbuata bəyanatlarla çıxış ediblər.
Almaniya Federativ Respublikasının Prezidenti Frank-Valter Ştaynmayerin aprelin 2-də Azərbaycan Respublikasına səfəri iki ölkənin etibarlı tərəfdaşlığının hərtərəfli və yüksələn xətlə inkişafının əyani göstəricisidir. Bu səfərin bütün sahələr üzrə əməkdaşlığın daha yüksək səviyyəyə qaldırılmasına önəmli təkan verəcəyi, gələcək inkişaf üçün böyük perspektivlər açacağı da şübhəsizdir.
“MƏN TAM ƏMİNƏM Kİ, BU SƏFƏR BİZİM ƏLAQƏLƏRİMİZƏ YENİ MÜSBƏT TƏKAN VERƏCƏKDİR”
Əvvəlcə Azərbaycan Respublikasının Prezidenti İlham Əliyev mətbuata bəyanatla çıxış edərək bildirib ki, Almaniya Prezidenti ilə aralarında siyasi dioloqun müntəzəm aparıldığından məmnundur: “Keçən ilin aprel ayında mən Berlində səfərdə olarkən Sizinlə görüşmüşdüm və şadam ki, mənim dəvətimi qəbul edib Siz Azərbaycana rəsmi səfərə gəlmisiniz.
Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir”.
“2030-CU İLƏ QƏDƏR BƏRPAOLUNAN ENERJİ NÖVLƏRİNİN İSTEHSAL GÜCÜNÜ 6 GIQAVATA ÇATDIRMAQ FİKRİNDƏYİK”
İqtisadi sahədə əldə edilmiş nəticələrdən söz açan Azərbaycan lideri bu ilin ilin yanvar-fevral aylarında bizim ticarət dövriyyəmizin təxminən üç dəfə artdığını vurğulayıb- bunun əsas səbəbi Azərbaycandan Almaniyaya ixrac edilən xam neftinin həcminin artması olmuşdur: “Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq”.
Dövlətimizin başçısı İlham Əliyev daha sonra bərpaolunan enerji sahəsində Almaniya şirkətlərinin, eləcə də Azərbaycanın çox böyük təcrübəsi, proqramı və planları olduğunu söyləyib: “Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”,- deyə vurğulayıb.
Ötən il Azərbaycanın COP29 beynəlxalq iqlim konfransına ev sahibliyini xatırladan Prezident İlham Əliyev bu istiqamət üzrə də Almaniya ilə çox fəal əməkdaşlığımızın olduğunu söyləyib. “COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi. İştirak etməyən yeganə ölkə Ermənistan olmuşdur. Bu da təbii olaraq təəssüf hissi doğurur. Çünki xüsusilə indiki şəraitdə - Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Bu gün bu məsələ də müzakirə olundu və Azərbaycanın mövqeyi Almaniya tərəfinə çatdırılmışdır”.
“TARİXİ ZƏFƏRİMIZ SÜLH DANIŞIQLARINA YOL AÇMIŞDIR”
Prezident İlham Əliyev Azərbaycanın 30 il ərzində erməni işğalından əziyyət çəkdiyindən, xalqımızın etnik təmizləməyə məruz qalmasından, bir milyon azərbaycanlının erməni aqressiyasına görə evsiz-eşiksiz qalmasından və torpaqlarımızın təxminən 20 faizi işğal altına düşməsindən ətraflı bəhs edərək beynəlxalq təşkilatlar bu məsələ ilə bağlı ciddi addım atmadıqlarınından təəssüfləndiyini bəyan edib. Dövlətimizin başçısı vurğulayıb ki, Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmiş, məhz bu tarixi Zəfərimiz sülh danışıqlarına yol açmışdır. “Hesab edirəm ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır.
Eyni zamanda, bu gün digər beynəlxalq məsələlər də müzakirə edildi, o cümlədən Amerika-Avropa İttifaqı gərginliyi, Rusiya-Qərb gərginliyi. Bütün bu məsələlər təbii olaraq bütün dünyaya təsir edir və səmimi fikir mübadiləsi aparmaq mənim üçün çox önəmli idi”.
Çıxışının sonunda Prezident İlham Əliyev bu səfərin çox müsbət nəticələri olacağına əminliyini ifadə edib. “İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir”.
AZƏRBAYCAN RESPUBLİKASI VƏ ALMANİYA FEDERATİV RESPUBLİKASI ARASINDA İKİTƏRƏFLİ MÜNASİBƏTLƏR
Almaniya Federativ Respublikası Azərbaycan Respublikasının müstəqilliyini 12 yanvar 1992-ci il tarixində tanımışdır. İki ölkə arasında diplomatik münasibətlər 20 fevral 1992-ci il tarixində qurulmuşdur. Azərbaycanın Almaniyada Səfirliyi 2 sentyabr 1992-ci il tarixində açılmışdır. Almaniyanın Azərbaycanda Səfirliyi 22 sentyabr 1992-ci il tarixində açılmışdır.
Azərbaycan və Almaniya arasında davamlı siyasi dialoq mövcuddur, iqtisadiyyat və humanitar sahələrində geniş əməkdaşlıq həyata keçirilir.
Azərbaycanla Almaniya arasında müxtəlif sahələrdə əməkdaşlıq sürətlə inkişaf edib.
Azərbaycan Respublikasının Prezidentinin AFR-ə 17 rəsmi və işgüzar səfəri həyata keçirilmişdir (Azərbaycan Respublikasının Prezidenti Heydər Əliyev: 01-4.07.1996; Azərbaycan Respublikasının Prezidenti İlham Əliyev: 24-26.08.2004, 22-23.09.2006, 14-16.02.2007, 21-22.11.2009, 04-06.02.2010, 03-05.02.2012, 20-21.01.2015, 06-08.02.2015, 12-14.02.2016, 06-07.06.2016, 17-19.02.2017, 14-16.02.2020, 16-18.02.2023, 13-14.03.2023, 16-18.02.2024, 25-26.04.2024).
Azərbaycan Respublikasının Baş nazirinin Almaniyaya 1 (işgüzar) səfəri həyata keçirilmişdir (Baş nazir A.Rasizadə: 21-23.10.2000);
Almaniya Federal Kanslerinin Azərbaycan Respublikasına 1 (rəsmi) səfəri həyata keçirilmişdir (federal kansler A.Merkel: 25.08.2018).
Azərbaycan Respublikasının xarici işlər nazirinin Almaniyaya 14 rəsmi və işgüzar səfəri həyata keçirilmişdir (nazir E.Məmmədyarov: 5-7.07.2006; 4-6.02.2008, 28-30.06.2010, 4-6.02.2011, 18-19.10.2012, 01-03.02.2013, 31.01-02.02.2014, 11.05.2016, 08-09.12.2016, 16-17.02.2018, 15-17.02.2019); nazir C.Bayramov: 28-29.03.2022, 16-18.02.2023, 28-29.02.2024);
Almaniya Federativ Respublikasının xarici işlər nazirinin Azərbaycana 8 rəsmi və işgüzar səfəri həyata keçirilmişdir (nazir K.Kinkel: 22.12.1995; nazir Y.M.Fişer: 20-21.05.2001, 21-22.04.2004; nazir F-V.Ştaynmayer: 19.02.2007; nazir Q.Vestervelle: 14-15.03.2012; nazir F-V.Ştaynmayer: 22-23.10.2014, 30.06.2016; nazir A.Berbok: 04.11.2023).
Azərbaycan-Almaniya parlamentlərarası əlaqələr üzrə işçi qrupu, Almaniya Bundestaqında isə Azərbaycanı da əhatə edən Almaniya-Cənubi Qafqaz parlament qrupu fəaliyyət göstərir.
Azərbaycan Respublikası Milli Məclisində Azərbaycan-Almaniya parlamentlərarası əlaqələr üzrə işçi qrupu (rəhbəri - Nurlan Həsənov) fəaliyyət göstərir. Almaniya Bundestaqında Almaniya-Cənubi Qafqaz parlament qrupu (sədri - Yohan David Vadeful, Xristian-Demokrat İttifaqı partiyası) Azərbaycanı da əhatə edir.
Azərbaycan Respublikası Milli Məclisi sədrinin Almaniyaya 2 səfəri həyata keçirilmişdir (spiker O.Əsədov: 8-10.09.2019; spiker S.Qafarova: 29-30.11.2023);
Almaniya Bundestaqının vitse-prezidentinin Azərbaycana 1 səfəri həyata keçirilmişdir (vitse-prezident K. Göring-Ekart: 18.07.2022).
Azərbaycan və Almaniya arasında müqavilə-hüquq bazası olduqca genişdir. Bu sahədə indiyədək 77 sənəd imzalanıb.
Almaniya Azərbaycanın Avropada ən vacib siyasi-iqtisadi tərəfdaşlarından biridir. Azərbaycan bu ölkə ilə əlaqələrin inkişafına mühüm önəm verir.Azərbaycanla Almaniya arasında müxtəlif sahələrdə əməkdaşlıq sürətlə inkişaf edib.
Ticarət və investisiyalar üzrə Almaniya-Azərbaycan yüksək səviyyəli İşçi Qrup 5 may 2011-ci ildə təsis edilmişdir.
Həmsədrlər:
Azərbaycan tərəfindən – iqtisadiyyat nazirinin müavini
Almaniya tərəfdən – Federal İqtisadiyyat və Enerji Nazirliyinin xarici iqtisadi siyasət idarəsinin baş direktoru Ekhard Frants.
İşçi qrupun indiyədək 9 iclası keçirilmişdir. 1-ci iclas 19-21 oktyabr 2011-ci ildə Berlində, sonuncu 9-cu iclas 10 fevral 2023-cü ildə Berlin şəhərində keçirilmişdir.
12 noyabr 2012-ci ildə Bakıda Alman-Azərbaycan Xarici Ticarət Palatası təsis edilmişdir. Alman-Azərbaycan Xarici Ticarət Palatası alman iqtisadiyyatının rəsmi nümayəndəliyi kimi şirkətlərə bazar və biznes araşdırmaları ilə bağlı məlumat və dəstək verir.
