Avqustun 28-də Heydər Əliyev Fondu tərəfindən Şamaxının İkinci Cabanı və Böyük Xınıslı kəndlərində yeni körpələr evi-uşaq bağçalarının açılışı keçirilib. Açılış mərasimində Fondun vitse-prezidenti Leyla Əliyeva iştirak edib.
Leyla Əliyeva bağçaların otaqları ilə tanış olub, uşaqlar üçün yaradılan şəraitə baxış keçirib. Hər iki bağça kəndlərin mərkəzində yerləşir və müasir, tam təchizatlıdır. Balacalar üçün yataq və oyun otaqları, idman və musiqi zalları, tibb otağı, yeməkxana, inzibati və texniki otaqlar mövcuddur. Məktəbəqədər təhsil müəssisələri zəruri mebel və avadanlıqlarla təmin edilib, həyətyanı sahədə yaşıllaşdırma işləri aparılıb və uşaq əyləncə qurğuları quraşdırılıb.
İkinci Cabanı kənd körpələr evi-uşaq bağçasının rəhbəri Töfə Bəşirova bildirib ki, bağça 41 ildir fəaliyyət göstərsə də, heç vaxt bu cür şərait olmayıb. “Köhnə bağça yararsız vəziyyətə düşdüyündən fərdi evdə fəaliyyət göstərirdik. Heydər Əliyev Fonduna müraciət etdik, qısa müddət ərzində yeni bağça inşa olunub təhvil verildi. Sabahdan uşaqları yeni bağçada qəbul edə biləcəyik. 1-3 və 4-6 yaş qrupları fəaliyyət göstərəcək. Qonşu kəndlərdən də müraciətlər var. Yaradılan şəraitə görə Fondumuza dərin minnətdarlığımızı bildiririk”, – deyə Töfə Bəşirova əlavə edib.
