Zəfərdən yeni inkişaf mərhələsinə

Oktyabrın 2-də Bakıda, Heydər Əliyev Mərkəzində Yeni Azərbaycan Partiyasının VIII Qurultayı keçirilib. Qurultayda Azərbaycan Respublikasının Prezidenti, Yeni Azərbaycan Partiyasının Sədri İlham Əliyev çıxış edib. Dövlətimizin başçısının nitqi Azərbaycanın keçdiyi mürəkkəb və tarixi inkişaf yoluna nəzər salmaqla yanaşı, ölkənin ərazi bütövlüyünün və dövlət suverenliyinin təmin olunmasından sonra qarşıda açılan yeni mərhələnin əsas istiqamətlərini də müəyyənləşdirib.

Bu baxımdan çıxışın məzmunu yalnız Yeni Azərbaycan Partiyasının fəaliyyəti çərçivəsində deyil, Azərbaycanın dövlətçilik tarixinin mühüm mərhələləri və gələcək inkişaf perspektivləri kontekstində də diqqət çəkir. Prezident İlham Əliyev keçilmiş yolu qiymətləndirərkən bugünkü nəticələrin hansı siyasi, iqtisadi və ictimai əsaslar üzərində formalaşdığını göstərib, qarşıdakı dövr üçün isə bir sıra strateji vəzifələri önə çəkib.

Azərbaycanın müasir tarixinin əsas xüsusiyyətlərindən biri ondan ibarətdir ki, ölkənin qarşısında duran mürəkkəb vəzifələr ayrı-ayrı mərhələlər üzrə, lakin vahid dövlətçilik xətti çərçivəsində həll olunub. Dövlət müstəqilliyinin möhkəmləndirilməsi, ictimai-siyasi sabitliyin təmin edilməsi, iqtisadi potensialın yaradılması, müdafiə qabiliyyətinin gücləndirilməsi və milli maraqlara əsaslanan xarici siyasətin həyata keçirilməsi sonrakı tarixi nəticələr üçün zəruri zəmin formalaşdırıb.

Prezident İlham Əliyev çıxışında Yeni Azərbaycan Partiyasının yaradıldığı dövrün ictimai-siyasi mənzərəsinə xüsusi diqqət yetirib. 1990-cı illərin əvvəllərində Azərbaycanın ciddi siyasi və iqtisadi böhranla üzləşməsi, ərazilərinin işğal olunması, dövlət idarəçiliyində yaranmış problemlər və sosial çətinliklər ölkənin gələcəyi ilə bağlı ciddi narahatlıqlar doğururdu.

Belə bir şəraitdə Yeni Azərbaycan Partiyasının təsis qurultayının keçirilməsi dövlətçilik baxımından mühüm siyasi hadisə kimi təqdim olunur. Prezidentin qeyd etdiyi kimi, həmin dövrdə Ulu Öndər Heydər Əliyevin ətrafında birləşən insanların əsas məqsədi Azərbaycanın gələcəyi ilə bağlı məsuliyyəti üzərinə götürmək və ölkənin düşdüyü ağır vəziyyətdən çıxmasına nail olmaq idi.

Heydər Əliyevin siyasi hakimiyyətə qayıdışından sonra dövlət idarəçiliyində sabitliyin bərqərar edilməsi, iqtisadiyyatın inkişafı üçün zəruri əsasların yaradılması, Azərbaycanın beynəlxalq mövqelərinin möhkəmləndirilməsi və ölkənin müdafiə potensialının artırılması istiqamətində ardıcıl siyasət həyata keçirilib. Bu proses sonrakı illərdə Azərbaycanın milli maraqlarını daha qətiyyətlə müdafiə etməsi üçün siyasi və iqtisadi imkanlar yaradıb.

Prezident İlham Əliyevin çıxışında bu tarixi mərhələyə verilən qiymətin əsas məğzi də məhz bundan ibarətdir: əldə olunan nəticələr təsadüfi hadisələrin deyil, uzun illər ərzində həyata keçirilən məqsədyönlü dövlət siyasətinin nəticəsi kimi təqdim olunur.

Bu siyasətin davamı olaraq Azərbaycan qarşısında dayanan ən mühüm milli vəzifələrdən biri — ərazi bütövlüyünün və suverenliyin təmin edilməsi məsələsi həllini tapıb.

2020-ci ilin Vətən müharibəsində əldə edilən Zəfər Azərbaycanın ərazi bütövlüyünün bərpası istiqamətində həlledici nəticə yaradıb. 2023-cü il sentyabrın 20-də isə ölkənin bütün ərazisində dövlət suverenliyi tam bərpa olunub. Prezident İlham Əliyev bu iki tarixi hadisənin Azərbaycan dövlətçiliyi baxımından əhəmiyyətini xüsusi vurğulayıb.

Beləliklə, Azərbaycanın qarşısında uzun illər dayanan əsas milli məsələlərdən biri öz həllini tapıb. Lakin Zəfər eyni zamanda yeni mərhələnin başlanğıcını müəyyənləşdirib.

Ərazi bütövlüyünün və dövlət suverenliyinin tam bərpası Azərbaycanın inkişaf gündəliyində yeni istiqamətlərin önə çıxmasına səbəb olub. Bu mərhələdə qarşıda duran əsas məsələlərdən biri azad edilmiş ərazilərin bərpası, burada dayanıqlı yaşayış və iqtisadi fəaliyyət üçün zəruri şəraitin yaradılmasıdır.

Qarabağ və Şərqi Zəngəzurda həyata keçirilən genişmiqyaslı quruculuq işləri bu prosesin əsas istiqamətlərindən birini təşkil edir. Prezident İlham Əliyev qurultaydakı çıxışında bildirib ki, hazırda həmin ərazilərdə 96 min insan yaşayır, çalışır və təhsil alır, bu bölgələrin inkişafına indiyədək 28 milyard manat vəsait ayrılıb, 48 yaşayış məntəqəsində keçmiş məcburi köçkünlərin məskunlaşması təmin edilib. Dövlətimizin başçısı Böyük Qayıdış prosesinin qarşıdakı illərdə daha da sürətlənəcəyini bildirib.

Bu rəqəmlər postmüharibə dövründə qarşıya qoyulan vəzifələrin miqyasını göstərir. Söhbət yalnız dağıdılmış infrastrukturun bərpasından getmir. Məqsəd yaşayış, sosial xidmətlər, məşğulluq və iqtisadi fəaliyyət üçün müasir və dayanıqlı mühitin formalaşdırılması, Qarabağ və Şərqi Zəngəzurun ölkənin ümumi inkişaf məkanına tam inteqrasiyasının təmin edilməsidir.

Bu mənada Zəfərdən sonrakı mərhələnin əsas xüsusiyyəti hərbi-siyasi nəticələrin sosial-iqtisadi və quruculuq nəticələri ilə tamamlanmasıdır.

Prezident İlham Əliyevin nitqində diqqət çəkən digər mühüm istiqamət dünyada gedən proseslərin fonunda Azərbaycanın təhlükəsizliyinin təmin olunması məsələsidir.

Dövlətimizin başçısı qeyd edib ki, Azərbaycanın yerləşdiyi regionun ətrafında müxtəlif münaqişələr və hərbi qarşıdurmalar davam edir. Belə bir beynəlxalq şəraitdə dövlətin müdafiə imkanlarının daim gücləndirilməsi və milli təhlükəsizliyin etibarlı şəkildə təmin olunması strateji əhəmiyyət daşıyır.

Lakin müasir dövrdə təhlükəsizlik yalnız hərbi güclə ölçülmür. İnformasiya məkanı, ideoloji təsirlər, rəqəmsal texnologiyalar və cəmiyyətin informasiya mühitində qarşılaşdığı çağırışlar da milli təhlükəsizlik məsələsinin mühüm tərkib hissəsinə çevrilib.

Prezident İlham Əliyev bu baxımdan ideoloji işin yeni məzmun almasının zəruriliyini xüsusi vurğulayıb. Dövlətimizin başçısının fikrincə, müasir ideoloji fəaliyyət formal tədbirlər və şablon yanaşmalarla məhdudlaşmamalı, Azərbaycanın reallıqlarının cəmiyyətə və beynəlxalq ictimaiyyətə düzgün çatdırılmasına xidmət etməlidir.

Bu yanaşma xüsusilə informasiya texnologiyalarının sürətlə inkişaf etdiyi bir dövrdə əhəmiyyətlidir. Dövlətçilik tarixinin, milli-mənəvi dəyərlərin və Azərbaycanın əldə etdiyi nəticələrin yeni informasiya mühitinin imkanlarından istifadə etməklə daha müasir və təsirli formada təqdim edilməsi qarşıda duran vəzifələr sırasındadır.

Prezidentin çıxışında sosial siyasətin davam etdirilməsi ilə iqtisadi inkişaf arasında birbaşa əlaqə də diqqətə çatdırılıb. Əhalinin rifahının yüksəldilməsi üçün davamlı iqtisadi artımın, investisiyaların və yeni iqtisadi imkanların təmin edilməsi vacib amil kimi göstərilib.

Dövlətimizin başçısı Azərbaycanda son iki ildə keçirilmiş Beynəlxalq İnvestisiya Forumlarında imzalanan investisiya müqavilələrinin ümumi həcminin 20 milyard dollardan çox olduğunu bildirib. Eyni zamanda, neft-qaz sektoru ilə yanaşı, qeyri-neft-qaz sektoruna da xarici investisiyaların cəlb edilməsinin əhəmiyyəti vurğulanıb.

Bu istiqamətdə Azərbaycanın nəqliyyat və logistika imkanlarının genişləndirilməsi də xüsusi yer tutur. Orta Dəhliz və Şimal-Cənub nəqliyyat dəhlizi üzrə həyata keçirilən tədbirlər ölkənin tranzit imkanlarının artırılmasına və regional iqtisadi əlaqələrdə rolunun genişləndirilməsinə xidmət edir. Prezident İlham Əliyev qarşıdakı dövr üçün Azərbaycan ərazisindən keçən tranzit yüklərin həcminin orta müddətdə 30 milyon tona çatdırılması hədəfini açıqlayıb.

Beləliklə, yeni inkişaf mərhələsində iqtisadi siyasətin əsas məsələlərindən biri mövcud potensialdan daha səmərəli istifadə etməklə yeni investisiya, məşğulluq və gəlir imkanlarının yaradılmasıdır.

YAP-ın VIII Qurultayında Prezident İlham Əliyevin nitqinin mühüm xüsusiyyəti ondan ibarətdir ki, çıxış yalnız keçmişin nəticələri ilə yekunlaşmır. Əksinə, əldə edilmiş nəticələrdən çıxış edərək qarşıdakı mərhələnin vəzifələri müəyyənləşdirilir.

Bu vəzifələr sırasında hərbi gücün daha da artırılması, iqtisadi inkişafın davam etdirilməsi, sosial rifahın yüksəldilməsi, investisiyaların cəlb olunması, Qarabağ və Şərqi Zəngəzurun bərpasının sürətləndirilməsi, Böyük Qayıdışın davam etdirilməsi, nəqliyyat və logistika imkanlarının genişləndirilməsi, eləcə də müasir ideoloji fəaliyyətin formalaşdırılması xüsusi yer tutur.

Bu istiqamətlərin hər biri ayrı-ayrılıqda mühüm olsa da, onların ümumi məqsədi eynidir: Azərbaycanın müstəqil inkişaf imkanlarını daha da genişləndirmək, dövlətin dayanıqlığını möhkəmləndirmək və əldə olunmuş tarixi nəticələrin uzunmüddətli inkişaf üçün möhkəm əsaslara çevrilməsini təmin etmək.

Prezident İlham Əliyevin qurultayda səsləndirdiyi fikirlər bu baxımdan Azərbaycanın keçmişdən gələcəyə uzanan inkişaf xəttinin mühüm məqamlarını bir araya gətirir. Dövlətçilik ənənələrinin möhkəmləndirilməsi ilə başlayan proses ərazi bütövlüyünün bərpası və dövlət suverenliyinin tam təmin olunması ilə yeni məzmun qazanıb. Qarşıdakı mərhələdə isə bu nəticələrin qorunması, ölkənin iqtisadi və müdafiə potensialının daha da gücləndirilməsi, insan kapitalının inkişafı və yeni imkanların yaradılması əsas vəzifələr sırasında olacaq.

Zəfər bir tarixi mərhələnin nəticəsidir. Qarşıda dayanan vəzifə isə bu Zəfərin yaratdığı yeni reallıqları Azərbaycanın davamlı inkişafının əsaslarına çevirməkdir. YAP-ın VIII Qurultayında dövlətimizin başçısının nitqinin ümumi məzmunu da məhz bu məntiqi xətti — keçilmiş yolun təcrübəsindən çıxış edərək daha güclü, daha dayanıqlı və yeni çağırışlara hazır Azərbaycanın formalaşdırılması istiqamətini əks etdirir.